ஆராய்ச்சிக் கட்டுரையை திருடி வௌியிட்ட பேராசிரியரின் சேவை இடைநிறுத்தம்

 

பேராசிரியர் லெஸ்லி குனவர்தனவின் ஆய்வுக்க் கட்டுரையைத் திருடி புத்தகம் வெளியிட்ட பேராதனைப் பல்கலைக்கழகப் பேராசிரியரின் சேவை இடைநிறுத்தம்!

பல்கலைக்கழகத்திற்குள் நுழையவும் தடை விதிப்பு

அசேல குருத்துவங்ச, மத்திய மாகாண விசேட நிருபர் - தினமின

பேராதனைப் பல்கலைக்கழகத்தின் முன்னாள் உபவேந்தரும், கீர்த்திமிக்க பேராசிரியருமான லெஸ்லி குணவர்தன அவர்களால் ஆங்கில மொழியில் எழுதப்பட்டு வெளியிடப்பட்ட ஆய்வுக்கட்டுரை  ஒன்றைப் பிரதிபலிக்கும் வகையில், அதனைத் திருடித் தனது சொந்தப் பெயரில் புத்தகமாக வெளியிட்ட சம்பவம் தொடர்பில் மேற்கொள்ளப்பட்ட முதற்கட்ட விசாரணைகளின் அடிப்படையில், பேராதனைப் பல்கலைக்கழக வரலாற்றுத் துறைப் பேராசிரியரின் சேவை உடனடியாக நடைமுறைக்கு வரும் வகையில் இடைநிறுத்துவதற்குப் பல்கலைக்கழக நிர்வாகம் நடவடிக்கை எடுத்துள்ளது.

இதற்கு மேலதிகமாக, குறித்த பேராசிரியருக்குப் பல்கலைக்கழக வளாகத்திற்குள் நுழைவதற்கும் தடை விதிக்கப்பட்டுள்ளது. அமெரிக்காவில் வசிக்கும் பேராசிரியர் லெஸ்லி குணவர்தனவின் நெருங்கிய உறவினர் ஒருவரால் செய்யப்பட்ட முறைப்பாட்டின் அடிப்படையில், இந்த மோசடியான செயல் குறித்து ஆராய்வதற்காக முதற்கட்ட விசாரணையை மேற்கொள்வதற்கு ஓய்வுபெற்ற மேல்நீதிமன்ற நீதியரசர் ஆர்.பி. ரணராஜா மற்றும் பேராசிரியர் நிர்மால் ரஞ்சித் தேவஸிரி ஆகியோர் நியமிக்கப்பட்டிருந்தனர்.

விசாரணைக் குழுவின் அறிக்கையின் மூலம், குறித்த பேராசிரியரால் லெස්லி குணவர்தனவின் ஆய்வுக் கட்டுரையொன்று பிரதி செய்யப்பட்டு அவரது பெயரில் வெளியிடப்பட்டுள்ளமை கண்டறியப்பட்டுள்ளது.

முதற்கட்ட விசாரணையின் பரிந்துரைகளுக்கு இணங்கப் பேராசிரியரின் சேவை இடைநிறுத்தப்பட்டுள்ளதாகப் பேராதனைப் பல்கலைக்கழக உபவேந்தர் பேராசிரியர் டெரன்ஸ் மதுஜித் தெரிவித்தார். இது தொடர்பாக தற்போது முறையான விசாரணை ஒன்று ஆரம்பிக்கப்பட்டுள்ளதாகவும் அவர் குறிப்பிட்டார். அத்துடன், சம்பந்தப்பட்ட பேராசிரியர் பல்கலைக்கழகத்தில் பதவி உயர்வு பெறுவதற்காக இந்த ஆய்வுக் கட்டுரையைப் பயன்படுத்தினாரா என்பது குறித்தும் தற்போது விசாரணைகள் ஆரம்பிக்கப்பட்டுள்ளன.